حماس اور فتح کے درمیان مفاہمتی بات چیت کا باقاعدہ آغاز

23اپریل (ایجنسی)
 فلسطینی تنظیم اسلامی تحریک مزاحمت "حماس" اور الفتح کی قیادت کے درمیان مفاہمت کا عمل آگے بڑھانے کے لیے باضابطہ مذاکرات شروع ہوگئے ہیں۔ رام اللہ سے آئے پانچ رکنی وفد اور حماس کی قیادت میں کل منگل کو غزہ کی پٹی میں وزیراعظم اسماعیل ھنیہ کی  رہائش گاہ پر مذاکرات کیے۔

مرکز اطلاعات فلسطین کے مطابق حماس کے سیاسی شعبے کے رکن ڈاکٹر خلیل حیہ نے "مرکز اطلاعات فلسطین" کو بتایا کہ رام اللہ سے آئے پانچ رکنی وفد کا غزہ کی پٹی میں حماس کی قیادت نے پرتپاک استقبال کیا۔ بعد ازاں فریقین میں خوشگوار



ماحوال میں بات چیت ہوئی۔ مذاکرات میں اب تک مفاہمتی معاہدوں کے طے شدہ نکات پرعمل درآمد پر توجہ مرکوز کی گئی۔

خیال رہے کہ رام اللہ سے الفتح کی قیادت اور دیگر رہنماؤں پر مشتمل پانچ رکنی وفد گذشتہ روز شمالی غزہ کی بیت حانون گذرگاہ سے داخل ہوا جہاں وفد کا پرتپاک استقبال کیا گیا۔

رام اللہ سے آئے وفد میں الفتح کی سینٹرل کمیٹی کے رکن عزام الاحمد، فلسطین پروگریسیو پارٹی کے سیکرٹری جنرل مصطفیٰ البرغوثی، عرب ۔ فلسطین فرنٹ کے سیکرٹری جنرل جمیل شحادہ اور پیپلز پارٹی کے رہ نما بسام صالحی اور معروف تاجر منیب المصری شامل تھے۔